Kínverjar eru ósáttir við fund Dalai Lama, andlegs leiðtoga Tíbeta með Barack Obama forseta Bandaríkjanna í dag en áður höfðu þeir kvatt Obama til að hundsa hinn útlæga Tíbeta.

Bandarísk yfirvöld segja Obama einungis hafa hitt Dalai Lama sem andlegan leiðtoga, þó hann hafi einnig viljað hlera Lama vegna þess hve hægt samskipti hans við kínversk yfirvöld ganga.

„Dalai Lama nýtur virðingar á alþjóðavísu sem trúarleiðtogi. Hann er talsmaður tíbetskra réttinda. Forsetinn væntir þess að eiga með honum uppbyggjandi fund,“ sagði talsmaður Bandaríkjastjórna.

Kínverjar tóku aftur upp viðræður við fulltrúa Dalai Lama í byrjun þessa árs eftir að viðræður höfðu legið niðri síðan í nóvember 2008. Enn sem komið er hefur lítið komið út úr endurnýjuðum viðræðum og óttast margir útlægir Tíbetar að Kínverjar bíði einungis eftir að Dalai Lama verði allur. Leiðtogi Tíbeta í viðræðum við Kínverja sagði Dalai Lama myndu ræða málefni Tíbeta og Kínverja í von um að finna lausn sem hentaði báðum þjóðum.

Stuðningsmenn Dalai Lama fögnuðu honum vel þegar hann kom til Hvíta hússins, en Dalai Lama hefur nú hitt alla sitjandi forseta frá því hann átti fund með George H. W. Bush árið 1991. Þá mun Hillary Clinton, utanríkisráðherra Bandaríkjanna fljótlega funda með hinum aldna trúarleiðtoga.

Hljótt var þó um fundinn miðað við aðra sambærilega fundi sem fara fram í Hvíta húsinu. Engar myndatökur voru leyfðar og fór fundurinn ekki fram í skrifstofu forsetaembættisins eins og venja er heldur í framkvæmdastjórnarherbergi. Er talið að þetta hafi átt að draga úr reiði kínverskra yfirvalda vegna fundarins sem vilja ekki að Dalai Lama sé í  samskiptum við erlend yfirvöld.

Ríkisstjórn Obama hefur sagst leggja kapp á að bæta samband Bandaríkjanna og Kína, og samvinnu í baráttunni við efnahagsástand i heiminum og loftslagsbreytingar. Þykir nýlegur 6,4 milljarða dala vopnasölusamningur Bandaríkjamanna við Tævana þó stinga nokkuð í stúf við þær yfirlýsingar.