Dalai Lama hefur nú lagt dýraverndunarsamtökum lið með því að að styðja við tillögu um að nautaat verði alfarið lagt niður í Katalóníu á Spáni.

„Ég tel að það séu sannfærandi gögn til staðar sem sýni fram á að nautaat sé grimm aðgerð, sem valdi saklausum dýrum  miklum sársauka,“ sagði Dalai Lama í bréfi sem samtök dýrverndunarsinna birtu í dag.

Dalai Lama hvatti þingmenn hins sjö milljóna manna sjálfsstjórnarhéraðs Katalóníu til að kjósa með því að frumvarpi sem skerpir á dýrvernd, en í dag er ill meðferð og dráp á nautum á nautaati undanþegin ákvæðum dýraverndunarlaga.

Verði frumvarpið samþykkt er Katalónía fyrsta hérað Spánar til að banna nautaat með lögum. Þegar hafa nokkrar borgir og bæjarfélög í héraðinu bannað slíka viðburði en nautaat er t.d. bannað í Barcelona, stærstu borg héraðsins.

Ríkisstjórnin hefur þegar sagt að hún styðji ekki bann við nautaati en virði ákvarðanir katalónska þingsins.