Rom Houben.

Komið hefur í ljós að Belginn Rom Houben, sem talinn var getað haft samskipti við fólk eftir að hafa verið í dái í 23 ár, getur það í raun ekki. Sagt var fyrst frá Houben sl. nóvember og var þá gjarnan sagt að um kraftaverk væri að ræða.

Læknirinn Steven Laureys hélt í upphafi að Houben gæti tjáð sig gegnum aðstoðarmann en Laureys heldur því nú fram að aðferðin sem var notuð virki ekki. „Saga Roms snýst um greiningu á meðvitund, ekki samskipti.“

Síðastliðið haust sögðu fjölmiðlar frá því að Houben gæti haft samskipti við annað fólk en hann hafði slasast alvarlega í bílslysi árið 1983. Eftir rúma tvo áratugi í dái voru sýnd myndskeið af honum senda frá sér skilaboð á sérstöku lyklaborði með aðstoð talmeinafræðings. Sá hélt um handlegg og fingur Houbens og þóttist finna nægan þrýsting frá Houben til að beina sér að réttum hnöppum á lyklaborðinu.

Laureys, sem er taugasérfræðingur við Liege háskólasjúkrahúsið í Belgíu, hafði áður sannreynt að Houben væri meðvitaðri um umhverfi sitt en áður hafði verið haldið og er enn talið að það sé rétt.  Hann taldi einnig að Houben gæti haft samskipti gegnum aðstoðarmann sinn en eftir nánari rannsóknir á Houben og öðrum sjúklingum í dái heldur hann að það geti ekki staðist.

Hlutir og skrifuð orð voru sýnd sjúklingunum í fjarveru aðstoðarmanna. Aðstoðarmennirnir voru síðan boðaðir inn í herbergin og sjúklinganir beðnir um að segja þeim hvað þeir hefðu séð og heyrt. Laureys segir tilraunina hafa sýnt með óyggjandi hætti að þessi samskiptamáti væri mjög óáreiðanlegur.

Prófessor í lífsiðfræði við University of Pennsylvania segir að sagan af Houben hafi verið of góð til að vera sönn og að henni hefði ekki átt að vera trúað. Spjaldið sem Houben og aðstoðarmaður hans hafi ekki verið áreiðanlegri en andaglös.