Írönsk stjórnvöld hafa engan áhuga á því að herfa stríð, en munu engu að síður bregðast hart við verði ráðist á landið. Þetta er haft eftir Ali Ahani, utanríkisráðherra, í viðtali við króatíska dagblaðið Vecernji List sem birtist í dag.

„Íranar munu engan veginn koma stríði af stað, en ef ráðist verður á okkur munum við bregðast hart við,“ segir Ahani.

Stjórnvöld í Ísrael hafa haft miklar áhyggjur af því að Íranar reyni að koma sér upp kjarnorkuvopnum undir því yfirskyni að aðeins unnið að því að koma upp kjarnorkuverum. Ísraelsmenn hafa þannig ekki útilokað að þeir ráðist á þau landsvæði í Íran þar sem unnið sé með kjarnorku.

Spurður um vopnabúr Írana segir Ahani Írana friðsæla þjóð og ítrekaði að allt starf stjórnvalda miði að því að verja landið gegn hótunum frá óvinaþjóðum.

Írönsk stjórnvöld reyna nú að verða sér úti um rússnesk flugskeytavarnarkerfi, en víða á Vesturlöndum er litið á þetta sem beina hótun.

Mahmoud Ahmadinejad, forseti Írans, lét í síðustu viku hafa eftir sér að Ísraelsmenn íhuguðu nú að koma stríði af stað með vorinu eða næsta sumar. Benjamin Netanyahu, forsætisráðherra Ísraels, hefur hins vegar vísað þessum ásökunum alfarið á bug.

Í viðtalinu varaði Ahani gegn veru erlendra herja, þeirra á meðal frá Atlantshafsbandalaginu (NATO) nærri landamærum Írans. „Stjórnvöld á Vesturlöndum selja mikið magn af vopnum til nágrannalanda okkar. Þegar maður hefur það í huga þá tel ég að við séum í fullum rétti til þess að bregðast við hvenær sem er,“ segir Ahani.