Stjórnvöld á Indlandi og í Pakístan hafa tekið upp formlegar viðræður eftir 14 mánaða hlé í þeim tilgangi að bæta stormasöm samskipti landanna tveggja. Viðræður sigldu á sínum tíma í strand vegna árásanna á Mumbai árið 2008.

Fyrirfram er ekki búist við miklu af viðræðunum milli Nirupama Rao, utanríkisráðherra Indlands, og Salman Bashir, utanríkisráðherra Pakistans, enda skeytasendingar ráðherranna tveggja í dagblöðum að undanförnu ekki gefið tilefni til þess.
Aðeins nokkrum klukkustundum áður en Bashir kom til höfuðborgar Indlands kvörtuðu indverskir landamæraverðir við landamæri Pakistans undan því að pakistanskir verðir hefðu skotið á sig.

„Ég er ekki mjög bjartsýnn,“ er haft eftir P. Chidambaram, innanríkisráðherra Indlands, á sama tíma og annar hátt settur ráðamaður lagði áherslu á að trúnaðarbrestur landanna tveggja mætti rekja til árásanna í Mumbai þar sem 166 manns létu lífið.

En sú staðreynd að fulltrúar kjarnorkuveldanna tveggja fáist yfir höfuð að samningaborðinu marka skref fram á við og binda menn vonir við að samkomulag verði gert um áframhaldandi viðræður.