Hamfarastigi lýst í Frakklandi

Hamfarastigi hefur verið lýst í þeim héruðum Frakklands sem urðu hvað verst úti er stormviðri gekk yfir landið í fyrrinótt. Vitað er um tæplega 50 manns sem biðu bana af völdum veðursins. Flestir þeirra drukknuðu er flóðgarðar brustu svo flæddi inn í hús og hjólhýsi.

Francois Fillon forsætisráðherra segir að með ákvörðun stjórnarinnar að lýsa yfir hamfarastigi verði hægt að ganga í sérstaka sjóði til endurreisnar og uppbyggingar á hamfarasvæðunum. Hafa Frakkar farið fram á aðstoð Evrópusambandsins (ESB) vegna endurreisnarstarfsins.

Nicolas Sarkozy forseti ráðgerir að ferðast um héröðin við Atlantshafsströndina sem verst urðu úti, Vendee og Charente-Maritime.

Enn var rafmagnslaust á um hálfri milljón heimila á þessum svæðum og víðar um land í morgun. Talið er að taka muni jafnvel nokkra daga að gera við raflínur.

Þegar veðrið var sem verst komst veðurhæðin í allt að 140 km/klst. Jók það á vandann í Frakklandi að stórstreymt var þegar veðrið gekk inn á land af hafinu.

Á leið sinni inn yfir meginland Evrópu gekk hvassviðrið einnig yfir Portúgal, Spán og Þýskaland. Varð manntjón af völdum þess í þeim öllum; ekkert þó í líkingu við það sem gerðist í Frakklandi.

Alls hafa 53 dauðsföll verið rakin til Atlantsstormsins, sem fengið hefur nafnið Xynthia. Óttast er að ekki séu öll kurl komin til grafar.