Rúmeninn Marion Clita, sem eftirlýstur er vegna morðs í Kaupmannahöfn.

Rúmeni, sem danska lögreglan hefur lýst eftir í tengslum við morð á norskri flugfreyju í Kaupmannahöfn á mánudag, hefur gefið sig fram við lögreglu í Malmö í Svíþjóð.

Norski fréttavefurinn ABC Nyheter segist hafa hringt í Clita, sem sagðist fyrst vera í Kaupmannahöfn en síðan að hann væri á leið á lögreglustöð í Malmö. Vefurinn segir, að vaktstjóri lögreglunnar í Malmö hafi nú síðdegis staðfest að Clita hafi haft samband.

„Ég hef tilkynnt mig til lögreglu í Malmö og sent frá mér mörg skjöl. Ég stend nú fyrir utan og bíð þess að lögreglan útvegi mér túlk. Ég tala rúmensku og ítölsku en það gerir lögreglan ekki," hefur ABC eftir manninum, sem sagður var tala bjagaða ensku í símann. 

Calle Persson, upplýsingafulltrúi lögreglunnar á Skáni, segir við Ekstra Bladet í Danmörku, að maður hafi komið inn á lögreglustöð í Malmö og sagst vera bendlaður við morðmál í Danmörku. Verið sé að yfirheyra manninn og staðfesta að hann sé sá sem hann segist vera.  

Lögreglan í Kaupmannahöfn lýst eftir Clita eftir hádegið í dag og sagði hann grunaðan um að hafa orðið 42 ára gamalli norskri konu, Veru Vildmyren, að bana á hótelherbergi í Kaupmannahöfn.