Angela Merkel, Þýskalandskanslari, telur að Grikkland þurfi að svo stöddu ekki fjárhagsaðstoð. Að hennar mati er búið að endurheimta stöðuleika evrusvæðisins. Þetta lét Merkel hafa eftir sér eftir fund sinn með George Papandreou, forsætisráðherra Grikklands.

„Grísk stjórnvöld hafa ekki óskað eftir fjárhagslegri aðstoð. Búið er að endurheimta stöðugleika evrusvæðisins á núverandi tímapunkti,“ sagði Merkel og tók fram að hún væri bjartsýn á að Grikkir myndu ekki þurfa að biðja um fjárhagsaðstoð.

Grísk þingið samþykkti í dag þriðju aðhaldsaðgerðir í því skyni að grynnka á skuldum ríkisins og endurheimta traust á fjármálakerfi landsins.

Merkel sagðist ánægð með þær aðgerðir sem grísk stjórnvöld hefði þegar gripið til, en tók fram að þau yrðu að gera meira og nefndi í því samhengi nútímavæðingu landsins. Tók hún fram að ráðamenn beggja landa hefðu sammælst um að vinna nánar saman á þessu sviði.

Stjórnmálaspekingar telja Þýskaland líklegasta bjargvættinn þegar kemur að því að aðstoða Grikkland í fjárhagsvandræðum landsins í ljósi þess hversu stórt og fjársterkt Þýskaland er. Yrði Grikkland gjaldþrota myndi það hafa gríðarlega neikvæð áhrif á löndin sextán sem mynda evrusvæðið. Mikil andstaða er hins vegar meðal Þjóðverja við því að hlaupa undir bagga með Grikkjum.

Papandreou er á ferð og flugi um Evrópu. Hann hitti ráðamenn í Lúxemborg fyrir skemmstu og mun um helgina funda með Nicolas Sarkozy, Frakklandsforseta. Í næstu viku á hann fund með Barack Obama forseta Bandaríkjanna.