Reuters

Samgönguráðherra Írans tilkynnti í dag að rússneskum flugmönnum sem í dag fljúga fyrir írönsk flugfélög verði skipt út fyrir heimamenn innan tveggja mánaða.

„Samgönguráðuneytið gefur rússneskum flugmönnum tveggja mánaða frest en að þeim tíma liðnum skulu þeir hafa yfirgefið landið,“ er haft eftir Hamid Behbahani, samgönguráðherra Írans. Segir hann Írana að þeim tíma liðnum munu eiga nógu marga flugmenn til að manna flugvélar landsins og því verði ekki lengur þörf á því að fá erlenda flugmenn til starfa.

Að svo stöddu liggur hvorki fyrir hversu margir rússneskir flugmenn fljúga í dag á vegum íranskra flugfélaga né heldur hvort nógu margir reyndir íranskir flugmenn eru fyrir hendi í landinu.

Fram að byltingunni árið 1979 var flugöryggi með því besta í Íran, en á síðustu árartugum hefur flugslysum fjölgað til muna í landinu. Í flestum tilfellum hefur verið um að ræða litlar vélar með rússneskar áhafnir.

Vegna viðskiptabanns hefur verið bannað að selja nýjar flugvélar eða varahluti til Írans á síðustu árum. Á sama tíma hefur eftirspurn eftir flugsamgöngum aukist til muna og því leituðu írönsk stjórnvöld til Rússlands og fengu þaðan bæði vélar og áhafnir.

Að mati þeirra írönsku fréttamanna sem rætt hefur verið við telja þeir að það verði ekki vandamál að manna flugvélarnar með heimamönnum. Benda þeir á að aðeins taki þrjá mánuði að þjálfa nýja aðstoðarflugmenn.