ENRIQUE CASTRO-MENDIVIL

Eftir Karl Blöndal kbl@mbl.is

Um 96 milljóna kvenna er „saknað“ í Asíu að mati Sameinuðu þjóðanna. Morð á stúlkubörnum og fóstureyðingar vegna kyns hafa leitt til alvarlegs ójafnvægis milli kynjanna í Asíu og er ástandið langverst á Indlandi og í Kína, samkvæmt skýrslu, sem þróunarstofnun SÞ (UNDP) birti í gær.

Í heiminum fæðast að meðaltali 107 drengir á móti hverjum 100 stúlkum. Líklegra er að drengir deyi þegar þeir eru ungbörn en stúlkur og þetta virðist vera leið náttúrunnar til að tryggja jafnvægi milli fjölda karla og kvenna við kynþroska. Í Austur-Asíu er hlutfallið hins vegar 119 drengir á móti hverjum 100 stúlkum. „Gamalt hugarfar þar sem sveinbörn eru tekin fram yfir blandast nú við nútímatækni í læknavísindum,“ sagði Anuradha Rajivan, aðalhöfundur skýrslunnar, og bætti við að tæknin gerði kleift að greina kvenkyns fóstur og eyða þeim.

Mestur er vandinn á Indlandi og í Kína. Samkvæmt skýrslunni er 85 milljóna kvenna „saknað“ þar.

Í Kína hefur orðið gríðarleg breyting til hins verra á aldarfjórðungi. Í úttekt í nýjasta tölublaði vikuritsins The Economist kemur fram að 108 drengir fæddust fyrir hverjar 100 stúlkur á árunum 1985 til 1989, sem er rétt yfir hinu eðlilega hlutfalli. Á árunum 2000 til 2004 var hlutfallið 124 drengir fyrir hverjar 100 stúlkur. Allt bendir til þess að þetta ósamræmi megi rekja beint til fóstureyðinga.

Í Kína ríkir sú stefna að hjón skuli aðeins eignast eitt barn, en á henni eru undantekningar, sem fara eftir búsetu og því hvort fyrsta barn hafi verið stúlka. Þegar tölurnar eru skoðaðar í Guangdo-héraði fæðast 120 sveinbörn fyrir hver 100 meybörn, en þegar horft er á fyrsta barn foreldra kemur í ljós að það fæðast 108 sveinbörn fyrir hver 100 meybörn. Við annað barn fer hlutfallið í 146 drengi á móti 100 stúlkum og í þeim fáu tilfellum þar sem foreldra fengu að eignast þriðja barn fór hlutfallið í 167 drengi á móti 100 stúlkum.

Kínverska félagsvísindaakademían spáði því í janúar að innan tíu ára yrði sú staða komin upp að fimmti hver ungur maður gæti ekki fundið sér konu. Árið 2020 yrði staðan sú að í Kína yrðu 30 til 40 milljónum fleiri karlar en konur undir 19 ára aldri. Kínverjar kalla þessa ógiftu karla berar greinar og þeim fjölgar ört. Tíðni glæpa hefur nánast tvöfaldast á undanförnum 20 árum og talið er að þetta megi að hluta til rekja til þessa ójafnvægis, til ungra karla, sem eru í reiðileysi vegna þess að þeir eiga hvorki konur né börn.

Á Indlandi hefur svipuð þróun átt sér stað þótt ástæðurnar séu aðrar. Þar eru synir teknir fram yfir dætur. Ekki eru haldnar skrár á Indlandi yfir nýfædd börn, en hlutfallið var 104 á móti 100 hjá börnum undir sex ára aldri 1981, en 108 á móti 100 árið 2001. Árið 1991 var eitt hérað þar sem hlutfallið milli kynjanna fór yfir 125 á móti hverjum 100, en 2001 voru héruðin orðin 46.

Þetta er ískyggileg þróun og hún mun aðeins breytast með auknu jafnrétti og áherslu á réttindi kvenna.

VIJAY MATHUR