Trúarleiðtogar í Hollandi tilkynntu í dag að sett yrði af stað sjálfsstæð allsherjarrannsókn vegna ásakana um  kynferðisofbeldi kaþólskra presta gegn börnum. Þá báðu þeir fórnarlömb kynferðisglæpanna afsökunar.

„Rannsóknin mun hefjast eins fljótt og kostur er," hefur AFP eftir Will van de Ven, talsmanni hollenska trúarbragðaþingsins (KNR) eftir fund sem haldinn var vegna frásagna um 200 fórnarlamba sem segjast hafa verið beitt kynferðisofbeldi á sjöunda og áttunda áratugnum.

Kaþólska kirkjan í Hollandi sagðist í síðustu viku myndu rannsaka ásakanir þriggja nemenda við klausturskóla í Austur-Hollandi um kynferðisofbeldi presta fyrir40-50 árum.  Sú ákvörðun kirkjunnar vakti mikil viðbrögð því í kjölfarið gáfu hátt í 200 aðrir fyrrum nemendur annarra kaþólskra skóla sig fram sem höfðu sömu sögu að segja.

Í sameiginlegri yfirlýsingu kaþólska biskuparáðsins og KNR segir að fregnirnar séu afar sársaukafullar og við þeim verði brugðist. „Kynferðisofbeldi af öllum gerðum verður að fordæma af krafti. Það stríðir gegn trúnni og gegn mannlegri reisn. Það er mikil synd að prestar og trúarleiðtogar á síðustu öld hafi brugðist þeirri skyldu sinni að veita börnum og ungmennum umhyggju."