Bandarísk stjórnvöld ákærðu í dag bandaríska konu, sem nefnd er JihadJane, fyrir að reyna að fá íslamska stríðsmenn til að gera hryðjuverkaárásir í Evrópu og Suður-Asíu. Sagðist konan hafa fengið fyrirskipun um að myrða ónafngreindan sænskan ríkisborgara.

Bandaríska dómsmálaráðuneytið upplýsti í kvöld, að gefin hefði verið út ákæra á hendur Colleen LaRose frá Pennsylvaníu, sem var handtekin í október. Var LaRose ákærð fyrir samsæri um að veita hryðjuverkamönnum aðstoð, um að fremja morð í erlendum ríkjum og fleiri glæpi.

Ráðuneytið sagði, að LaRose og fimm samverkamenn hennar í Asíu, Evrópu og Bandaríkjunum, hefðu reynt að fá menn og konur gegnum netið til að gera árásir.

Fram kemur að LaRose hafi fallist á að fremja morð í útlöndum og veita hryðjuverkamönnum stuðning. Hafi LeRose, sem er 46 ára, fengið beina fyrirskipun um að myrða sænskan borgara og gera það með þeim hætti sem myndi vekja skelfingu í heimi vantrúarmanna.

Ekki er ljóst hvort LaRose tengist sjö múslimum, sem handteknir voru á Írlandi í dag vegna áforma um að myrða sænska  skopteiknarann Lars Vilks. Hryðjuverkasamtök höfðu lagt 100 þúsund dali honum til höfuðs eftir að hann teiknaði Múhameð spámann í líki hunds.