Lögreglan í Nígeríu segir að 49 verði ákærðir fyrir fjöldamorð í þorpum í nágrenni borgarinnar Jos fyrr í vikunni. Alls létust 109 í blóðbaðinu en áður var talið að 500 hefðu týnt lífi þegar ofbeldismenn gengu berserksgang vopnaðir sveðjum.

Flestir þeirra sem verða ákærðir eru múslímar sem tilheyra Fulani hópnum, samkvæmt upplýsingum BBC frá lögreglu.

Alls hafa 200 verið handteknir í tengslum við fjöldamorðin aðfararnótt mánudags.  Þeir sem létust voru kristnir en í janúar myrtu kristnir fjöldamorðingjar um þrjú hundruð múslima. En þrátt fyrir að átökin séu á milli ólíkra trúarhópa þá snúist þau ekki bara um trúarbrögð heldur efnahagsmál og stjórnmál.

Íbúi þorpsins Dogo Nahawa segir í samtali við BBC að hann hafi heyrt öskur frá nágrönnunum, líkt og það væri verið að ráðast á þá. „Ég fór til nágranna minna. Ég sá allar eiginkonurnar, þeir höfðu myrt þær, skorið líkama þeirra og kveikt í þeim. Og líka börnin. Þeir höfðu  myrt öll börnin," segir nágranninn í samtali við BBC.

Leiðtogi þorpsins segir að barnabarn hans, fimm ára gömul stúlka, hafi verið  brytjuð niður með sveðjum af mönnum sem töluðu fulani-mál. Árásarmennirnir hafi fyrst skotið úr hríðskotabyssum til þess að fá íbúa þorpsins út úr húsum sínum.