Benjamin Netanyahu, forsætisráðherra Ísraels, harmaði í morgun á fundi með Joe Biden, varaforseta Bandaríkjanna, að ísraelsk stjórnvöld skyldu í vikunni hafa tilkynnt um áform um að reisa 1600 ný hús fyrir gyðinga í Austur-Jerúsalem.

Áformin hafa valdið uppnámi víða um heim. Biden, sem er í heimsókn í Ísrael, fordæmdi þau í gær og það sama hefur Ban Ki-moon, framkvæmdastjóri Sameinuðu þjóðanna gert, og forsvarsmenn Evrópuríkja. 

Benjamin Netanyahu, forsætisráðherra Ísraels, harmaði í morgun á fundi með Joe Biden, varaforseta Bandaríkjanna, að ísraelsk stjórnvöld skyldu í vikunni hafa tilkynnt um áform um að reisa 1600 ný hús fyrir gyðinga í Austur-Jerúsalem. 

Í yfirlýsingu frá skrifstofu Netanyahus segir, að forsætisráðherrann hafi rætt við Biden, sem nú er á Vesturbakkanum, og sagt að engin þörf hefði verið á að hraða skipulagsvinnu í Austur-Jerúsalem í ljósi þess ágreinings, sem er á milli Ísraels og Bandaríkjanna um byggingar þar.  

Mahmud Abbas, forseti Palestínumanna, mun að sögn aðalsamningamanns hans ekki hefja friðarviðræður við Ísraelsmenn að nýju fyrr en þeir hætta við áform um nýjar gyðingabyggðir í austurhluta Jerúsalem. Palestínumenn vilja að Austur-Jerúsalem verði höfuðborg sjálfstæðs ríkis þeirra. 

Zvi Hauser, ráðuneytisstjóri forsætisráðuneytis Ísraels, sagði við ísraelska útvarpið í morgun, að það hefðu verið mistök að tilkynna um nýju byggðina  meðan á heimsókn Bidens stóð. Sagði Hauser, að Netanyahu hefði átt langan fund með Eli Yishai, innanríkisráðherra, í gær en það var ráðuneyti hans sem gaf út tilkynninguna.