JihadJane vekur óhug
Colleen LaRose, öðru nafni JihadJane. Reuters
Það hefur vakið óhug í Bandaríkjunum og víðar, að kona á fimmtugsaldri, Colleen LaRose, sem virtist vera venjuleg húsmóðir, nefndi sig JihadJane í samskiptum á netinu og tók þátt í að skipuleggja hryðjuverk. Bandaríska dómsmálaráðuneytið hefur ákært LaRose fyrir aðild að hryðjuverkastarfsemi en hún tók m.a. þátt í að skipuleggja morðtilræði við sænska skopteiknarann Lars Vilks.
„Það er óhugnanlegt þegar þetta gerist svona nálægt manni," sagði aldraður maður, sem býr við sömu götu og LaRose í úthverfi Philadelphíu.
Kurt Gorman, fyrrum sambýlismaður LaRose, sagði við sjónvarpsstöðina CNN að hann hefði ekki haft hugmynd um hvað LaRose hafðist að. Hann segir að hún hafi að vísu oft setið lengi við tölvuna en talið að hún væri í tölvuleikjum. Í ljós hefur komið, að hún átti í umfangsmiklum tölvusamskiptum við hryðjuverkasamtök og bauð fram þjónustu sína.
Sama dag og LaRose voru fjórir karlmenn og þrjár konur handtekin á Írlandi grunuð um að hafa lagt á ráðin um að ráða Lars Vilks af dögum. Vilks kallaði yfir sig reiði múslima með því að teikna skopmynd af Múhameð spámanni.
Nágrannar LaRose í Pennsburg sögðu að það kæmi einkum á óvart, að LaRose skyldi hafa aðhyllst róttækar íslamskar skoðanir án þess að sambýlismann hennar grunaði neitt. Þau Gorman og LaRose bjuggu saman í fimm ár og hún hugsaði um aldraðan föður Gormans þar til hann dó í ágúst í fyrra. Daginn eftir útförina hvarf LaRose.
„Ég kom heim og hún var horfin. Ég hafði miklar áhyggjur því það hlaut eitthvað að hafa komið fyrir," sagði Gorman við CNN. Hann sagði að LaRose hefði tekið vegabréf hans með sér.
Hópar, sem fylgjast með samskiptum róttækra íslamskra samtaka létu bandarísk stjórnvöld vita af LaRose, sem hafði m.a. sett myndskeið á YouTube og lýst þar og víðar róttækum skoðunum sínum.
Sérfræðingar segja, að mörg mál af þessu tagi kunni að koma upp á Vesturlöndum á næstunni. „Það sem er uggvænlegast er að það hljóta að vera til aðrir eins og hún sagði Farhana Ali, sérfræðingur í íslamskenningum. „Hún var með tengslanet, einhver innrætti henni þessar skoðanir. Innrætingin fer alltaf fram í hópum - og hvar er þessi hópur?" spurði hún í samtali við AFP fréttastofuna. „Hver er leiðtogi hans. Hver fékk hana til að taka þetta hlutverk að sér?"
