Winnie Madikizela-Mandela. mbl.is

Winnie Mandela, fyrrverandi eiginkona Nelsons Mandela, fyrrum forseta Suður-Afríku, neitaði því í gær að hafa veitt enska blaðinu Evening Standard viðtal en blaðið hafði í vikunni eftir Winnie ýmis ummæli sem hafa valdið miklu uppnámi í Suður-Afríku.

Blaðið hafði m.a. eftir  Winnie Madikizela-Mandela, að fyrrum eiginmaður hennar hefði brugðist suður-afrísku þjóðinni og hún gæti ekki fyrirgefið honum að hafa þegið friðarverðlaun Nóbels árið 1993 ásamt F.W. De Klerk, þáverandi forseta Suður-Afríku.

Madikizela-Mandela segist nú ekki hafa veitt blaðinu viðtal en ber þó ekki til baka að hafa viðhaft þessi ummæli.

„Ég mun á næstu dögum fást við það sem ég lít á sem óskiljanlega tilraun til að grafa undan einingunni í fjölskyldu minni, arfleifð Nelsons Mandela og þeirri virðingu, sem borin er fyrir Mandela-nafninu hér og um allan heim," segir Madikizela-Mandela í yfirlýsingu sem Nelson Mandela stofnunin sendi frá sér.   

Evening Standard segir að Nadira Naipaul, eiginkona Nóbelsskáldsins V.S. Naipaul, hafi tekið viðtalið við Winnie. Blaðið segir að Nadira Naipaul sé virtur blaðamaður, sem hafi heimsótt Winnie Mandela á heimili hennar og rætt ýtarlega viðhana. „Við skiljum ekki að Winnie Mandela skuli afneita því að viðtalið hafi farið fram," segir í yfirlýsingu frá blaðinu.

Nadira Naipaul hefur einnig lýst því yfir að viðtalið hafi fram eins og því sé lýst í blaðinu og hún hafi haft yfirlýsingar Winnie rétt eftir.

Í viðtalinu sakar Winnie Mandela núverandi stjórnvöld í Suður-Afríku um að hagnýta sér ímynd Nelsons Mandela en skáka honum jafnframt út á hliðarlínuna. Þá segir hún að Desmond Tutu, biskup og þjóðhetja í Suður-Afríku, sé rugludallur.

Winnie Mandela barðist fyrir því að þáverandi eiginmaður hennar yrði látinn laus úr fangelsi. Þau skildu hins vegar sex árum eftir að Mandela var sleppt en hann sakaði Winnie um framhjáhald. Samband þeirra hefur þó batnað á undanförnum árum.