Stokkhólmur.

Lögreglan í Stokkhólmi rannsakar nú nafnlausa hótun um fjöldamorð í Konunglega sænska tækniháskólanum þar í borg á morgun. Hótunin kom inn á samskiptavefsíður á föstudag frá ónafngreindum manni.

„Ég hafði hugsað mér að halda mig heima á morgun eins og flestir aðrir sem ekki eiga erindi í skólann,“ segir Hulda Þorbjörnsdóttir sem er að ljúka meistararnámi í eðlisverkfræði við skólann. Hún segir marga þó þurfa að mæta í próf en verið sé að ræða hvort það eigi að fresta þeim þar sem skólayfirvöld og lögregla taki hótunina alvarlega.

Nemendur ætla margir hverjir að halda sig heima á morgun, samkvæmt fréttum sænskra fjölmiðla.

"Ég ætla að skjóta eins marga og ég næ til áður en lögreglan kemur og skýtur mig," er meðal skilaboðanna sem maðurinn sendi frá sér.

Haft er eftir talsmanni lögreglunnar í Stokkhólmi að hótunin sé tekin mjög alvarlega og allt verði gert til að koma í vegi fyrir að hún nái fram að ganga.

 Yfirvöld skólans taka hótunina sömuleiðis alvarlega og hafa lýst sig reiðubúin til fulls samstarfs með lögreglunni, og virkja einnig öryggisáætlanir skólans.

Skrifaði maðurinn á vefinn að hann ætlaði að taka með sér skammbyssu í skólann á mánudag og skjóta eins marga og hann næði til.

Nemendur við skólann eru skiljanlega órólegir yfir þessu og hyggjast margir þeirra ekki ætla að mæta á morgun, sem fyrr segir.