Gabbfrétt um innrás Rússa hefur vakið mikla reiði í Georgíu. Fréttin, sem birt var á georgískri sjónvarpsstöð á laugardag, vakti í upphafi mikinn ótta hjá íbúum.

Ríkisstjórn Mikheil Saakashvili, sem er hlynnt aukinni samvinnu við Vesturlönd, hefur lýst því yfir að stjórnvöld séu jafn hissa og aðrir á gabbinu. Stjórnarandstaðan hefur hins vegar fullyrt að um ríkisstyrkt gabb hafi verið að ræða og ætlunin hafi verið að kasta óorði á andstæðinga stjórnvalda.

Að sögn georgískra fréttastöðva olli fregnin miklum ótta. Neyðarlínunni bárust fjölda símtala, mikil aukning varð á hjartaáföllum og fjöldi frétta var af fólki sem féll í yfirlið.

Fréttin var send út á einkareknu sjónvarpsstöðinni Imedi í gærkvöldi.  Þar kom fram að rússneskir skriðdrekar væru nú á leið til höfuðborgarinnar Tíblisi, Saakashvili hefði verið myrtur og að stjórnarandstaðan hefði slegist í lið með innrásaröflunum.

Með fréttinni voru birtar myndir af innrás rússneskra hersveita í Georgíu í ágúst 2008. Örstutt yfirlýsing var birt á undan fréttinni þar sem fram kom að um eftirlíkingu mögulegra atburða væri að ræða. Fréttin sjálf virkaði hins vegar mjög svo raunveruleg og henni fylgdi enginn viðvörun að um gabb væri að ræða.

Nino Burjanadze, leiðtogi stjórnarandstöðunnar, og einn þeirra sem sagður var hafa slegist í lið með Rússum, sagði um ríkisrekinn áróður að ræða. „Það er svívirðilegt hvernig stjórnvöld fara með kjósendur. Ég er viss um að hver sekúnda naut samþykkis Saakashvilis. Margir fengu andlegt áfall,“ sagði Burjanadze í viðtali við AFP-fréttastofuna.

Yfirvöld í Georgíu hafa sætt vaxandi gagnrýni frá stofnunum sem fylgjast með frelsi fjölmiðla á alþjóðavettvangi. En stjórnvöld þykja ráðskast með fjölmiðla, sérstaklega ljósvakamiðlana.

Ríkisstjórnin neitar því hins vegar með öllu að sér hafi verið kunnugt um birtingu fréttarinnar fyrirfram og fordæmdi hana sem óábyrga.

Imedi sjónvarpsstöðin hefur beðist afsökunar á útsendingunni, en þó ekki fyrr hópur reiðra Georgíubúa hófu mótmælaaðgerðir og fordæmdu stöðina.

Yfirvöld í Rússlandi hafa líka fordæmt fréttina og kallað hana ríkisrekin áróður.