Lögreglan í Huntington Beach í Kaliforníu gæti verið komin á sporið í nokkrum óleystum sakamálum, eftir að hafa birt meira en 100 ljósmyndir í eigu Rodney Alcala, sem dæmdur var til dauða í vikunni fyrir fimm morð. Myndirnar eru aðallega af konum, sem í sumum tilvikum hefur verið saknað til fjölda ára.

Við rannsókn lögreglu fundust myndirnar í geymslu sem Alcala leigði í borginni Seattle. Ákveðið var að birta myndirnar og setja þær út á vef lögreglunnar. Þær fengu gríðarleg viðbrögð, eða nærri 2,5 milljónir fyrirspurna. Fjöldi kvenna hefur gefið sig fram og tilkynnt sig óhulta en lögreglan óttast um afdrif margra annara og gruna Alcala um að hafa komið þeim fyrir kattarnef.

Í frétt Reuters er haft eftir saksóknara málsins að Alcala hafi skipulagt þau fimm morð, sem hann var dæmdur fyrir, mjög gaumgæfilega. „Áður en hann gekk upp að húsunum eða skreið inn um gluggana og drap þessar konur, hafði hann haft nægan tíma til að hugsa," segir saksóknarinn Matt Murphy.

Alcala hefur gengið undir nafninu Stefnumótamorðinginn, vegna þátttöku hans í stefnumótaþætti í sjónvarpi fyrir um 40 árum, þar sem honum mistókst að krækja sér í þá konu sem var í boði. Fannst konunni hann vera eitthvað ógeðfelldur. Alcala hafði í tvígang áður verið dæmdur til dauða, fyrir morð er hann framdi árið 1979, en þeim úrskurðum var hnekkt.