Franskar útgönguspár gefa til kynna að  UMP mið-hægri flokkur  Nicolas Sarkozy forseta Frakklands hafi beðið lægri hlut í fyrri umferð héraðskosninganna líkt og spáð hafði verið.

Sarkozy og kona hans Carla Bruni gengu glaðbeitt til kosninga í dag, þar sem þau brostu við stuðningsmönnum  og virtust hvorki láta hrakfararspár né sögur um meint framhjáhald og skilnað á sig fá.

Samkvæmt spám benti allt til þess að Sósíalistar fengju 30% greiddra atkvæða en  UMP flokkurinn um 26,5% og þykir það til vitnis um að kjósendur séu með þessu að refsa ríkisstjórn Sarkozy fyrir skort á árangri.

Sarkozy hefur sagt að kosningarnar eigi að snúast um staðbundnar áherslur en hann muni þó taka mark á því hvar kjósendur ákveða að setja atkvæði sitt.   

Forsetinn glímir nú meðal annars við að vinna á atvinnuleysi sem mælist um 10% auk þess sem miklar deilur hafa spunnist um launamál í stjórn hans. Persónulegar vinsældir Sarkozy  eru sagðar hafa dalað þó nokkuð að undanförnu og mælist ánægja með störf hans nú í um 36%.

Þetta eru síðustu kosningarnar á landsvísu í Frakklandi  fyrir þing- og forsetakosningar árið 2012. Sósílistar stjórna nú þegar 20 af 22 héruðum Frakklands og vonast til að niðurstöður sýni að þeir hafi nú náð þeim öllum.  Er talið að niðurstaðan geti haft mikil áhrif á gengi Sarkozy í næstu forsetakosningum. Góð niðurstaða sósíalista myndi einnig auka vonir flokksleiðtogans Martine Aubry um að verða fulltrúi flokksins í forsetakosningunum árið 2012.

Síðari umferð héraðs kosninganna fer fram 21. mars  en kosningaþátttaka í þessari umferð virðist hafa verið frekar dræm.