Segir verkfall óréttlætanlegt
Hluti flugflota hins breska flugfélags British Airways. Suzanne Plunkett
Samgönguráðherra Breta gagnrýnir harðlega fyrirhugað verkfall 12.000 flugfreyja og flugþjóna hjá flugfélagi British Airways og segir það "algjörlega óréttlætanlegt."
Í viðtali við BBC í dag sagði ráðherrann Adonis að verkfallið kæmi ekki aðeins til með að valda flugfarþegum erfiðleikum sem væru í engu samræmi við deiluefnið. Heldur ógnaði það einnig framtíð eins glæstasta fyrirtækis Breta. Verkfallið væri algjörlega óréttlætanlegt og hann hvatti til þess að farið yrði í uppbyggilegar samningaviðræður við félagið.
„Við skulum hafa það á hreinu að það liggur ótrúlega mikið undir þessu verkfalli og ég er algjörlega á móti þessu verkfalli,“sagði Adonis.
Alistair Darling, fjármálaráðherra Breta, var öllu dempaðri í ummælum um fyrirhugað verkfall og sagði nauðsynlegt að deiluaðilar settust að samningaborðinu til að forða almenningi frá óþægindum án þess þó að nýr samningur kæmi niður á efnahagslífinu.
Vill að ráðherrann þrýsti á British Airways
Talsmaður Unite, félags starfsmannanna, sagði ummæli breska samgönguráðherrans sýna að hann væri illa upplýstur um málið. Það væri samningsvilji til staðar þeirra hálfu og þau vildu komast hjá því að koma þyrfti til verkfalls. Þá hvatti hann ráðherrann til að þrýsta opinberlega á talsmenn BA um að koma aftur að samningaborðinu með tilboð sem þeir lögðu fram í vikunni. Forsvarsmenn BA drógu tilboðið til baka á föstudag eftir að hafa sagt að það væri háð því að komist yrði hjá verkfalli.
Talsmenn BA taka undir orð samgönguráðherrans og segja fyrirhugaðar verkfallsaðgerðir í engu samræmi við þá hagsmuni sem liggi undir. Starfsmennirnir séu best launaðir breskra flugfélaga.
Þjálfa starfmenn til að vinna í verkfalli
Ferðaáætlanir þúsunda Breta eru í uppnámi verði af verkfallinu þann 20. mars sem er fyrirhugað að standi í þrjá daga. Annað fjögurra daga verkfall er einnig boðað þann 27. mars. Talsmenn Unite hafa hins vegar lýst því yfir að félagsmenn verði ekki í verkfalli yfir páskana.
Til að bregðast við yfirvofandi verkfalli segjast stjórnendur BA hafa þjálfað starfsfólk í stað verkfallsmanna og að verði af verkfalli verði hægt að halda sem mestu af áætlunarflugi áfram.
Hótanir um verkföll flugfreyja og flugþjóna British Airways hafa vofað yfir frá því að félagið tilkynnti í nóvember um uppsagnir og frystingu launa í tvö ár frá og með 2010.
