Ráðhústurninn í Árósum. mbl.is/GSH

Meirihluti borgarstjórnar Árósa vilt breyta stafsetningunni á nafni borgarinnar. Borgin heitir Århus á dönsku en borgarstjórinn vill að nafnið verði skrifað Aarhus og vísar til þess að danska bolluaið sé ekki heppilegt í alþjóðlegu samhengi. 

Fram kemur á fréttavef Århus Stiftstidende, að Nicolai Wammen, borgarstjóri, sem er fulltrúi Jafnaðarmannaflokksins, telji að bolluaið standi borginni fyrir þrifum þegar verið sé að kynna hana á alþjóðlegum vettvangi. Því sé betra að taka upp gamla ritháttinn á ný. Fulltrúar Sósíalíska þjóðarflokksins eru þessu sammála, segir blaðið, og þar með eru 19 borgarfulltrúar af 31 með breytingunni.

„Århus á langa og merka sögu að baki og nafnið Aarhus mun bæði vísa til fortíðarinnar og inn í framtíðina," hefur blaðið eftir Thomas Medom, formanni borgarstjórnarflokks Sósíalíska þjóðarflokksins við blaðið.

Talsverður kostnaður er því fylgjandi að breyta borgarnafninu en Medom segist vera viss um að sá kostnaður skili auknu umtali um borgina og fleiri ferðamönnum. 

Árósar breyttu um  nafn þegar nýjar stafsetningarreglur tóku gildi í Danmörku árið 1948.