Námsmenn gægjast í gegnum hluta af Berlínarmúrnum sem geymdur er til minja um múrinn sem skildi að Austur- og Vestur-Þýskaland. Reuters

Nærri fjórðungur Þjóðverja „hugsar stundum að það væri betra ef Berlínarmúrinn væri enn á sínum stað“ að því er kemur fram í könnun sem birt var í dag.

Könnunin var gerð af könnunarfyrirtækinu Emnid fyrir þýska dagblaðið Bild og náði til 1.001 svaranda. Niðurstöður hennar sýndu einnig að 16% svarenda töldu að endurbygging farartálmans illræmda „yrði það besta sem gæti gerst“.

Niðurstöður könnunarinnar sýndu lítinn mun á afstöðu fólks sem bjó austan eða vestan við múrinn á sínum tíma. Þannig kváðust 23% fyrrum Austur-Þjóðverja og 24% fyrrum Vestur-Þjóðverja vera hlynnt nýjum múr.

Berlínarmúrinn var 155 km langur. Kommúnistastjórnin í Austur-Berlín reisti farartálmann á einni nóttu og skipti þar með  borginni í tvennt. Berlínarmúrinn var ein helsta tákmynd andstæðra fylkinga kalda stríðsins. 

Múrinn féll í byltingu án átaka þann 9. nóvember 1989. Mannfjöldinn braut niður hindrunina og hundruð þúsunda Austur-Þjóðverja streymdu til vesturs.