Stokkhólmur.

Karlmaður hefur verið handtekinn í Gautaborg fyrir að hóta fjöldamorði í  Konunglega sænska tækniháskólann í Stokkhólmi (KTH). Fréttir bárust af því í gær að lögreglan í Stokkhólmi rannsakaði nafnlausa hótun sem birtist á samskiptavefsíðu um fjöldamorð í tækniháskólanum þar í borg í dag.

„Á mánudag ætla ég að fara með skammbyssuna mína í KTH og skjóta eins marga og ég get," stóð á vefsíðunni. 

Fréttavefur Dagens Nyheter hefur eftir Bjorn Engström hjá Stokkhólmslögreglunni, að maðurinn hafi verið handtekinn skömmu eftir miðnættið í nótt eftir að ábendingar bárust. Maðurinn hafi viðurkennt í yfirheyrslum í nótt að hafa sett hótunina á netið. 

Lögreglan í Stokkhólmi tók hótunina alvarlega og í gærkvöldi voru um 50 lögreglumenn látnir gæta skólans. Ekki var ljóst í morgun hvort dregið yrði úr viðbúnaðnum vegna handtökunnar.

Nemendur ákváðu margir í gær að halda sig heima í dag. „Ég hafði hugsað mér að halda mig heima  [í dag] eins og flestir aðrir sem ekki eiga erindi í skólann,“ segir Hulda Þorbjörnsdóttir sem er að ljúka meistaranámi í eðlisverkfræði við skólann.

Hulda segir marga þó þurfa að mæta í próf en rætt var um það í gær að fresta þeim.