Maðurinn setti hótun á netið um að fjöldamorð yrði framið í KTH í dag. mynd/KTH

Stuðst var við ábendingar og slóðir voru raktar í netheimum til að hafa uppi á 33 ára gömlum manni sem hótaði að fremja fjöldamorð í Konunglega tækniháskólanum, KTH, í Stokkhólmi í dag. Maðurinn var handtekinn í nótt og játaði hótunina á sig.

Fréttavefur Aftonbladet hefur þetta eftir Ulf Göranzon, upplýsingafulltrúa lögreglunnar. Hann sagði að rakin hafi verið spor sem maðurinn skildi eftir sig á netinu þegar hann sendi frá sér hótunina. Lögreglan fann IP-tölu tölvu mannsins og gat rakið slóðina að henni.

Maðurinn skrifaði nokkrar orðsendingar með hótunum á spjallvefinn 4chan.org. Hann hótaði því að mæta í KTH með íþróttaskammbyssu í KTH skólann í dag og skjóta þar eins marga og hann gæti. Í einni hótuninni kvaðst hann m.a. ætla að „slá met“ finnskra fjöldamorðingja. Ástæða hótananna mun vera sú að kærasta mannsins sagði honum upp.

Lögreglan tók hótanirnar strax mjög alvarlega og voru um 50 lögreglumenn strax settir á vörð við skólann. Skólanum var ekki lokað þrátt fyrir hótunina. Lögreglan verður áfram á verði við skólann. 

Sérfræðingar lögreglunnar á sviði tölvuglæpa röktu slóðina. Talsmaðurinn sagði að bæði sænska lögreglan og erlend lögregluyfirvöld hafi komið að lausn málsins. Fréttavefur Svenska dagbladet segir að bandaríska alríkislögreglan FBI hafi aðstoðað við hafa uppi á manninum, enda spjallvefurinn vistaður í Bandaríkjunum.

Handtaka mannsins var án átaka og viðurkenndi maðurinn brot sitt. Ekki liggur enn fyrir hvort hann er nemandi við skólann. 

Þeim nemendu KTH sem treystu sér ekki til að mæta í skólann í dag til að taka próf verður boðinn nýr próftími, samkvæmt tilkynningu á heimasíðu skólans.