Mótmælt hefur verið daglega í Grikklandi að undanförnu vegna niðurskurðar á ríkisútgjöldum. YIORGOS KARAHALIS

Grikkir vöruðu Evrópusambandið aftur við því í dag að grípi sambandið ekki til frekari aðgerða þeim ekki til hjálpar vegna yfirþyrmandi skuldavanda heima fyrir, neyðist þeir til að leita á náðir Alþjóðagjaldeyrissjóðsins.

Þetta kom fram í útvarpsviðtali á grískri stöð í dag við talsmann grísku stjórnarinnar George Petalotis sem sagði niðurstöðu af fundi fjármálaráðherra ESB í gær ekki nógu afgerandi varðandi aðgerðir Grikkjum til hjálpar.

Ráðherrarnir komu saman í Brussel í gær þar sem þeir lögðu blessun sína yfir skattahækkanir og niðurskurð í Grikklandi sem eiga að vinna á gríðarlegum skuldum og fjárlagahalla landsins.

Þeir samþykktu hins vegar aðeins lánveitingar til Grikkja sem neyðaraðgerð ef til greiðslufalls kæmi og evrunni væri ógnað.

Afskipti stofnana utan ESB illa séð

Petalotis sagði engan vilja leita á náðir AGS en hins vegar gæti farið svo þar sem lítið annað væri í boði og vísaði þar til samþykktar ESB ráðherranna. Grikkir þyrftu á lánsfé með viðunandi vöxtum að halda og þau vaxtakjör sem þeim byðust í dag væru óviðunandi. Ættu Grikkir að trúa að ESB gæti ekki haft áhrif á vaxtakjör, þá þyrfti að endurmeta stöðu sambandsins í heimsmálunum.

Grikkir töluðu um það fyrr í mánuðinum að leita til AGS en bæði ESB og Seðlabanki Evrópu hafa sagt það alveg klárt að afskipti stofnana utan sambandsins væru ekki vel séð.

Grikkir hafa lofað því að ná inn um 16 milljörðum evra, um 2.800 milljörðum króna á þessu ári með niðurskurði ríkisútgjalda og skattahækkunum, til að reyna að vinna á fjárlagahalla sem nemur um 12,7% af þjóðarframleiðslu og skuldum upp á um 300 milljarða evra, yfir 52.000 milljörðum króna. Samkvæmt heimildum innan ESB er talið að Grikkir vilji fá um 20-25 milljarða evra, um 3.500-4.400 milljarða króna, að láni í gegnum evrusamstarfið.