Einn maður gaf sig fram við lögregluna og annar var handtekinn í dag vegna ráns á tæplega 250 þúsund evrum, eða ríflega 43 milljónum kr., á pókermóti á hóteli í Þýskalandi. Ránið, sem framið var um hábjartan dag þykir minna um margt á bandaríska hasarmynd. 

Rúmlega tvítugur Þjóðverji, í fylgd lögfræðings síns, gaf sig á mánudag fram við saksóknara í Berlín og viðurkenndi að hafa tekið þátt í ráninu um helgina. Eftir ítarlegar yfirheyrslur gaf hann upp nöfn vitorðsmanna sinna, auk þess að bjóðast til að endurgreiða sinn hluta hins 242.000 evra ránsfengs - þó féð væri á þeim tímapunkti í vörslu þriðja aðila. 

Vitorðsmennirnir reyndust vera 19 ára Þjóðverji, tvítugur Tyrki og tvítugur maður af óþekktu þjóðerni, að því er AFP-fréttastofan hefur eftir Sjors Kamstra, talsmanni skrifstofu saksóknara.

Í dag var einn vitorðsmannanna síðan handtekin og er málið nú talið upplýst.

Ránið þykir um margt minna á bandaríska hasarmynd, enda réðust mennirnir grímuklæddir og vopnaðir um hábjartan dag inn á Hyatt hótelið við Potsdamer Platz í Berlín.  Myndbandsupptökur úr öryggismyndavélum af atburðinum sýna hvernig þeir gripu poka af fé og tókust á við öryggisverði áður en þeir brunuðu á burt í svörtum Benz.

Pókermótið var hluti af Evrópsku pókermótaröðinni og tóku um 950 manns þátt, m.a. tennisstjarnan Boris Becker. En heildarverðlaunaféð nam 4.7 milljónum evra.