mbl.is/GSH

Bandaríkjamaður af pakistönskum uppruna játaði fyrir rétti í Chicago í Bandaríkjunum í dag, að hafa stundað hryðjuverkastarfsemi. Hann viðurkenndi að hafa notað fyrirtæki vinar síns sem skálkaskjól til að kanna aðstæður í Mumbai fyrir hryðjuverkaárás sem þar var gerð árið 2008 og að undirbúa árás á danska blaðið Jyllands-Posten.

Maðurinn, sem heitir David Coleman Headley og er 49 ára, sagðist hafa starfað á vegum tveggja pakistanskra hryðjuverkasamtaka. Hann er sonur fyrrum pakistansks sendimanns og bandarískrar konu og er sagður hafa vingast við Bollywood-stjörnur á Indlandi á meðan hann var að undirbúa hryðjuverk. 

Headley dvaldi í 2 ár í Mumbai og fór meðal annars í bátsferðir um höfn borgarinnar til að finna heppilega lendingarstaði fyrir árásarmennina, sem myrtu 166 manns í árásinni í nóvember árið 2008.

Þá var Headley þegar byrjaður að undirbúa sprengjuárásir á byggingar danska blaðsins Jyllands-Posten til að hefna fyrir að blaðið birti haustið 2005 skopmyndir af Múhameð spámanni. Það voru pakistönsku hryðjuverkasamtökin Harakat-ul-Jihad-Islam,  sem ætluðu að standa fyrir þeirri árás. 

Stjórnvöld í Indlandi og Bandaríkjunum sögðu ljóst, að samtökin Lashkar-e-Taiba í Pakistan hefðu skipulagt árásina í Mumbai. Headley sagðist hafa byrjað að vinna fyrir þessi samtök árið 2002. Hann kannaði einnig möguleika á árás á indverska kvikmyndaverið, sem nefnt er Bollywood, og á helgasta Hindúamusteri landsins.

Headley var handtekinn á O'Hare flugvellinum í Chicago í október þegar hann ætlaði að afhenda 13 eftirlitsmyndbönd, sem hann komst yfir þegar hann þóttist hafa áhuga á að kaupa auglýsingar í Jyllands-Posten.