Bandaríska fulltrúadeildin mun greiða atkvæði um heilbrigðismálafrumvarp á sunnudag. Reiknað er með, að Barack Obama, Bandaríkjaforseti, muni fresta fyrirhugaðri ferð sinni til Asíu enn um nokkra daga eða fram í næstu viku vegna málsins.  Hann hefur lagt gríðarlega áherslu á að lögum um heilbrigðisþjónustu verði breytt.

AFP fréttastofan hefur eftir Chris Van Hollen, þingmanni demókrata, að þeir muni væntanlega birta frumvarpstextann allan í dag þannig að hann verði á netinu þremur sólarhringum fyrir atkvæðagreiðsluna eins og þeir hafa áður heitið. 

AP fréttastofan hefur eftir Steny Hoyer, öðrum demókrata, að verði frumvarpið að lögum muni það draga úr fjárlagahalla um 100 milljarða dala á fyrstu tíu árunum og yfir 1 billjón dala á áratugnum þar á eftir. Samt sem áður er gert ráð fyrir að lögin tryggi að nánast allir Bandaríkjamenn fái aðgang að heilsugæslu og banni tryggingafélögum að neita því að gefa sjúkum kost á að kaupa heilbrigðistryggingu. 

Afgreiðsla málsins á Bandaríkjaþingi er afar flókin. Fulltrúadeildin samþykkti heilbrigðisfrumvarp á síðasta ári og öldungadeild þingsins samþykkti talsvert breytta útgáfu sem margir demókratar í fulltrúadeildinni eru ekki sáttir við. Nú er gert ráð fyrir, að fulltrúadeildin samþykki útgáfu öldungadeildarinnar og síðan muni báðar þingdeildir samþykkja viðbótarfrumvarp sem sníði helstu vankanta af heilbrigðisfrumvarpinu. 

Hoyer segir, að þingmenn í fulltrúadeildinni séu nú að ganga úr skugga um, að starfsbræður þeirra í öldungadeildinni muni samþykkja viðbótarfrumvarpið.