Hosni Mubarak, forseti Eygptlands. Reuters

Í moskum um allt Egyptaland hefur fólk beðið fyrir því að forseti landsins, Hosni Mubarak, nái heilsu á ný. Forsetinn, sem er 81 árs, hefur verið á sjúkrahúsi í Þýskalandi í næstum tvær vikur.

Fjölmiðlar hliðhollir Mubarak hafa flutt fréttir um að heilsa hans sé að batna, en ekki hefur komið fram hvenær þess er að vænta að hann snúi heim. Heilsa Mubarak er viðkvæmt mál í Egyptalandi og hefur ýtt undir óstöðugleika í stjórnmálum og efnahagsmálum landsins vegna þess að ekki er augljóst hver eigi að taka við af honum.

Í dag birti egypsk sjónvarpsstöð nýja mynd af Mubarak þar sem hann sést sitja við borð og blaða í skjölum. Birting myndanna leiddi strax til þess að hlutabréfamarkaðurinn í Egyptalandi tók við sér. Markaðurinn hafði dagana á undan lækkað vegna orðróms um að heilsa forsetans væri verri en opinberir fjölmiðlar hafa haldið fram.

Háttsettur embættismaður í ráðuneyti trúmála sagði að það væri skylda allra múslima að biðja fyrir þjóðhöfðingja landsins. Veikindi Mubaraks tengjast því að gallblaðra hans var fjarlægð 6. mars. sl.

Mubarak hefur verið forseti Egyptalands í 29 ár. Fimmta kjörtímabili hans lýkur á næsta ári.