Barack Obama veifar til fólks á fundi í Virginíu í dag þar sem hann rak áróður fyrir tillögum sínum. Reuters

Vaxandi líkur eru nú taldar á að Barack Obama Bandaríkjaforseta takist að fá umdeildar tillögur sínar um breytingar á heilbrigðiskerfinu  samþykktar á þingi á sunnudag.  Alls þarf 216 atkvæði í fulltrúadeildinni en öldungadeildin hefur þegar samþykkt hugmyndirnar.

Sigri Obama verður komið á kerfi sem tryggir að þorri landsmanna njóti sjúkratrygginga en nú eru um 10% án slíkra trygginga. Þótt demókratar hafi mikinn meirihluta í deildinni eru sumir  þerirra mjög andvígir tillögunum. En síðustu dagana hafa sumir þeirra skipt um skoðun eftir fortölur og þvinganir af hálfu leiðtoga flokksins.

 Frumvarpið er afar flókið og um 2,700 blaðsíður. Er ætlunin að með því verði tryggt að fátækasta fólkið í landinu sé tryggt. En margir óttast að það muni merkja stóraukin ríkisútgjöld sem ekki sé verjandi þegar ríkið sé orðið skuldsettara en dæmi eru um.

 Einnig eru margir á því að það sé fremur verkefni einstakra sambandsríkja að ákveða hvernig tilhögun sjúkratrygginga en alríkisstjórnarinnar og þingsins í Washington. Kannanir sýna að meirihluti landsmanna er andvígur tillögunum.