Það urðu fagnaðarfundir þegar hinn fimm ára gamli Sahil Saeed, sem var rænt í Pakistan, kom heim til Bretlands í nótt. Fjölmenni fylgdist með heimkomu piltsins sem sýndi fjölmiðlum lítinn áhuga við heimkomuna enda faðmur foreldranna mun álitlegri heldur en kastljós fjölmiðlanna.

Mál Saeed hefur vakið heimsathygli en honum vær rænt af heimili ömmu sinnar í Punjab-héraði í Pakistan í byrjun mars. Var hann í heimsókn hjá ættingjum þar í landi ásamt föður sínum. 

Fjölskyldan greiddi mannræningjunum 110 þúsund pund í lausnargjald og var Saeed látinn laus í kjölfarið heill á húfi.

Fyrr í vikunni voru tveir karlar og ein kona handtekin á Spáni grunuð um aðild að mannráninu. Eins voru tveir handteknir í París en þar greiddi faðir drengsins lausnargjaldið. 

Meðal þeirra sem komu í heimabæ Saeed fjölskyldunnar, Oldham, var  Gordon Brown, forsætisráðherra Bretlands. Hann segir að það sé mikil gæfa að þessi harmsaga hafi endað jafn vel og raun ber vitni með heimkomu Sahil.