Líbanskur sjónvarpsþáttastjórnandi hefur verið dæmdur til dauða í Saudi-Arabíu fyrir galdra. Samtökin Amnesty International hafa hvatt Abdullah konung til að koma í veg fyrir aftöku Ali Hussain Sibat og krefjast þess að honum verði sleppt undir eins.

Sibat, sem er fimm barna faðir, stjórnaði áður fyrr vinsælum sjónvarpsþætti þar sem áhorfendur gátu hringt inn og leitað ráða. Spáði Sibat fyrir um framtíðina og veitti áhorfendunum heilræði. Sibat var í heimsókn í Saudi-Arabíu í maí 2008 þegar hann var handtekinn af trúarlögreglunni. Hann var ákærður fyrir galdrabrögð.

Réttað var yfir Sibat og í nóvember sl. var hann fundinn sekur og dæmdur til dauða. Hann áfrýjaði málinu en fyrir skömmu var ákveðið að dómurinn skyldi standa. Lögmaður Sibat segist ætla að áfrýja málinu á ný.

Í nýlegri yfirlýsingu dómaranna, sem ákváðu að dauðarefsingin skyldi standa, segir að Sibat verðskuldi aftökuna þar sem hann hafi ítrekað ástundað svartagaldur í sjónvarpsþætti sínum. Dómurinn hefði að auki þau áhrif að færri iðkuðu galdra.