Benedikt páfi 16. bað í dag fórnarlömb kynferðislegrar misnotkunar presta á Írlandi afsökunar. Hann sagði í bréfi til kaþólsku kirkjunnar á Írlandi að það hefði verið mistök af kirkjunnar hálfu að hylma yfir með þeim sem brotin frömdu.

Páfi sagðist taka undir með fórnarlömbum kynferðislegrar misnotkunar og fjölskyldum þeirra sem lýst hafa því yfir að þau líti svo á að kirkjan hafi svikið þau. Páfi sagði að biskupar kirkjunnar hefðu gert „alvarleg mistök“ þegar þeir fengu upplýsingar um misnotkunina.

Bréfið felur í sér opinbera yfirlýsingu páfagarðs. Þetta er í fyrsta skipti sem slíkt bréf er sent en ásakanir um brot kirkjunnar á Írlandi ná áratugi aftur í tímann. Bréfið kemur í kjölfar upplýsinga sem hafa vegið að rótum kaþólsku kirkjunnar á Írlandi.

Ásakanir umkynferðisbrot innan kaþólsku kirkjunnar hafa verið lagðar fram í fleiri löndum, m.a. í Þýskalandi, heimalandi páfa.

Sean Brady, yfirmaður kaþósku kirkjunnar á Írlandi, las bréf páfa upp í kirkju í dag. Hann hefur sjálfur verið gagnrýndur jarðlega fyrir að hafa tekið þátt í að hylma yfir með þeim sem brutu af sér. Sumir þeirra sem gagnrýnt hafa viðbrögð kirkjunnar höfðu vonast eftir að honum yrði gert að segja af sér.

Maeve Lewis, talsmaður fórnarlambanna, sagði að bréf páfa gengi of skammt og kæmi of seint.

„Þið hafið mátt þola svívirðilega og ég biðst sannarlega afsökunar,“ sagði páfi og bætti við „traust ykkar hefur verið svikið og virðing ykkar hefur verið smáð. Ég lýsi yfir skömm og jafnframt iðrun.“