Flugfreyjur breska flugfélagsins British Airways lögðu niður vinnu á miðnætti og er ljóst að mikil röskun verður á rekstri félagsins í dag og næstu daga en verkfallið á að standa í 3 sólarhringa.  Félagið vonast þó til að hægt verði að halda úti um 65% af áætlunarflugi þess.

Að sögn AP fréttastofunnar hefur Unite verkalýðsfélagið aflað sér stuðning hjá verkalýðsfélögum í Bandaríkjunum, Þýskalandi og á Spáni vegna verkfallsins, sem boðað er til að mótmæla launafrystingu og breytingum á vinnuaðstæðum. Önnur verkalýðsfélög hafa þó ekki hótað beinum aðgerðum, svo sem að neita að þjónusta vélar British Airways í öðrum löndum. 

Alls er gert ráð fyrir að 1100 flug verði farin af 1950, sem eru áætluð næstu þrjá sólarhringa. British Airways hefur meðan annars leigt flugvélar og áhafnir af öðrum flugfélögum.  

Yfir 60% af millilandaflugi British Airways frá Heathrow flugvelli verður farið en aðeins 30% af innanlandsfluginu. Allt millilandaflug félagsins frá Gatwick verður samkvæmt áætlun.  

British Airways tapaði 401 milljón punda, jafnvirði 77 milljarða króna, á síðasta rekstarári og 292 milljónum punda, jafnvirði 56 milljörðum króna á fyrri hluta yfirstandandi rekstarárs. 

Annað fjögurra daga verkfall er boðað 27. mars, náist ekki samningar fyrir þann tíma. Þá eru frekari verkfallsaðgerðir fyrirhugaðar um miðjan apríl.