„Við ætlum að klára þetta,“ sagði Barack Obama, forseti Bandaríkjanna, þegar hann hélt ræðu um heilbrigðisfrumvarp sitt, en á morgun verða greidd atkvæði um frumvarpið í fulltrúadeildinni.

Steny Hoye, leiðtogi Demókrata í fulltrúadeildinni segist sannfærður um að meirihluti sé fyrir frumvarpinu í deildinni, en 216 þurfa að segja já til að frumvarpið verði samþykkt.

Leiðtogar Demókrata í fulltrúadeildinni ákváðu að láta greiða atkvæði um þá gerð frumvarpsins sem var samþykkt í öldungadeildinni frekar en að fara hefðbundna leið sem hefði leitt til þess að frumvarpið yrði að lögum án atkvæðagreiðslu.

Frumvarpið hefur áður verið samþykkt bæði í fulltrúadeildinni og öldungadeildinni, en öldungadeildin breytti frumvarpinu og því þarf það að fara aftur til fulltrúadeildarinnar.

Obama flutti ræðu í dag þar sem hann skoraði á þingið að samþykkja lögin. Hann lagði áherslu á að frumvarpið fæli í sér að áfram yrði byggt á núverandi tryggingakerfi og því væri ekki um það að ræða að verið væri að ríkisvæða heilbrigðiskerfið eins og andstæðingar frumvarpsins hafa haldið fram. Hann sagði að frumvarpið fæli í sér málamiðlun milli þeirra sem teldu ekki nægilega langt gengið og þeirra sem teldu of langt gengið.

Obama hefur lagt gríðarlega áherslu á þetta mál. Einn af andstæðingum hans sagði að ef frumvarpið yrði fellt gæti Obama farið heima til Camp David, sem er sumardvalarstaður forsetans, og verið þar í fríi út kjörtímabilið. Forseti sem tapaði svona mikilvægri atkvæðagreiðslu hefði ekkert meira fram að færa. Obama sagði í dag að hann gerði sér grein fyrir að þetta yrði tvísýn atkvæðagreiðsla.

Frumvarpið felur í sér að 32 milljónir Bandaríkjamanna sem eru ekki með neina sjúkratryggingu í dag fá aðgang að heilbrigðisþjónustu.