Allar líkur eru á að fulltrúadeild Bandaríkjaþings samþykki í kvöld frumvarp Obama forseta um breytingar á heilbrigðismálum.

Leiðtogar demókrata segja að meirihluti þingmanna styðji frumvarpið.

Í Bandaríkjunum eru tvö sjúkratryggingakerfi sem njóta fjárhagsstuðnings frá ríkinu. Þau kallast Medicare (aðallega sniðið að þörfum eldra fólks) og Medicaid (aðallega fyrir lágtekjufólk).

Meginreglan er sú að einstaklingar verða sjálfir að velja sér sjúkratryggingu. Flestir fá slíka tryggingu fyrir milligöngu atvinnuveitenda, en aðrir kaupa sér tryggingu frá einkafyrirtækjum.

Þessar tryggingar byggjast á því að fólk greiði reglulegt iðgjald, en stundum þarf fólk að greiða hluta af kostnaði við læknisaðgerð áður en tryggingafélagið borgar sjúkrakostnað.

Þegar spurt er hvað sé að bandaríska heilbrigðiskerfinu ber fyrst að nefna að Bandaríkjamenn vörðu 16,2% af landsframleiðslu til heilbrigðismála árið 2007 sem er nærri tvisvar sinnum meira en önnur lönd í OECD vörðu í heilbrigðismál.

Þar til viðbótar er áætlað að árið 2008 hafi 46,3 milljónir Bandaríkjamanna ekki verið með neina sjúkratryggingu. Bandaríkjamenn eru um 300 milljónir. Hafa ber í huga að af þessum 46 milljónum eru 9,2 milljónir ólöglegir innflytjendur og um 18 milljónir með árstekjur yfir 50 þúsund dollara á ári (6,3 milljónir króna), sem eflaust telja sig ekki þurfa á tryggingum að halda. En einnig má nefna að milljónir Bandaríkjamanna eru með sjúkratryggingu sem er of lág og dekkar ekki nema takamarkaðan kostnað.

Þegar einhver sem ekki er með neina sjúkratryggingu eða er með takmarkaða tryggingu verður veikur verður hann að greiða lækniskostnað úr eigin vasa. Talið er að helming af gjaldþrotum í Bandaríkjunum megi rekja til þess að fólk hefur ekki ráðið við kostnað sem kom til vegna veikinda.

Frumvarp stjórnar Obama felur í sér strangari reglur um sjúkratryggingar, hver og einn mun eiga rétt á sjúkratryggingu, sett verður upp trygging fyrir þá sem eru ekki með sjúkratryggingu frá vinnuveitenda og sjúkratryggingin verður niðurgreidd fyrir þá efnaminni. Þessi niðurgreiðsla verður þó mismunandi milli svæða. Ætlunin er að fjármagna stóran hluta þessara útgjalda með því að skera niður kostnað við Medicare.

Það sem andstæðingar frumvarpsins hafa helst gagnrýnt er að það feli í sér ríkisvæðingu í heilbrigðismálum og eins er ágreiningur um leiðir til að fjármagna viðbótarkostnað sem frumvarpið hefur í för með sér. 

Demókratar eru með meirihluta bæði í fulltrúadeildinni og öldungadeildinni. Engu að síður var talið tvísýnt að frumvarpið yrði samþykkt. Ástæðan er sú að innan flokksins eru þingmenn sem eru óánægðir með frumvarpið, annað hvort vegna þess að þeim finnst frumvarpið ekki ganga nógu langt eða vegna þess að þeim finnst það ganga of langt. Kosningar verða í nóvember og hafa sumir þingmenn áhyggjur af því að frumvarpið geti spillt fyrir endurkjöri þeirra.