Starfsfólk British Airways sneri aftur til vinnu í dag Reuters

Flug á vegum British Airways er að færast í eðlilegt horf á ný eftir þriggja daga verkfall áhafa flugfélagsins en verkfallinu lauk í gærkvöldi.

Er búið að setja fjölda flugferða sem ekki var hægt að fljúga á meðan verkfallinu stóð á áætlun í dag og næstu daga, samkvæmt frétt á vef BBC.

Flugliðar BA hafa boðað annað verkfall þann 27. mars en það á að standa í fjóra sólarhringa. Flugmenn og flugfreyjur félagsins krefjast hærri launa og bættra skilyrða í vinnu en samningafundir hafa ekki skilað árangri. Ekki hefur verið boðað til nýrra viðræðna en verkalýðsfélög flugliðanna hafa skorað á Willie Walsh, forstjóra BA, að setjast að samningaborðinu á ný.

British Airways hefur sent frá sér tilkynningu um að ekki sé gert ráð fyrir því að verkfallið hafi mikil áhrif á afkomu félagsins á yfirstandandi rekstrarári.

Tap BA áfyrstu níu mánuðum rekstrarársins, apríl-desember 2009, nam 342 milljónum punda fyrir skatta. Er lögð mikil áhersla á það hjá BA að skera verulega niður rekstrarkostnað þar sem félagið fari að öðrum kosti í þrot.

Gordon Brown, forsætisráherra Bretlands, hefur rætt við deiluaðila og hvatt þá til þess að ná samkomulagi en ekki hefur verið rætt um að setja lög á verkfallið líkt og gert var með flugvirkja hjá Icelandair í gær.

Beðið eftir flugi á Heathrow Reuters

Frá Heathrow flugvelli í Lundúnum í gær Reuters