Barack Obama forseti Bandaríkjanna undirritaði í dag frumvarp sitt til laga um breytingu á heilbrigðismálum í Bandaríkjunum. Nýju lögin þýða einar róttækustu breytingar í heilbrigðismálum Bandaríkjanna áratugum saman og munu tryggja nær öllum íbúum landsins sjúkratryggingu. 

Obama staðfesti lögin við athöfn í Hvíta húsinu og kváðu þar við mikil fagnaðarlæti, klapp og blístur þegar hann skrifaði undir. Obama sagði: „Frumvarpið sem ég er hér að undirrita mun koma af stað endurbótum sem kynslóðir Bandaríkjamanna hafa barist fyrir og hungrað að sjá."

Nýju lögin koma til með að tryggja 32 milljónum manna sem áður voru ótryggðir sjúkratryggingu. Repúblikanar mótmæltu frumvarpinu harðlega og töldu það of dýrt. Stjórnmálaskýrendur segja Obama nú þurfa að „selja“ kjósendum umbæturnar fyrir þingkosningar í nóvember.

Sjúkratrygging fyrir fólk eins og móður sína

Á vef BBC kemur fram að Obama sagðist við undirritun frumvarpsins hafa sett það fram fyrir fólk eins og móður sína „sem átti í baráttu við sjúkratryggingafyrirtækin fram á síðasta dag jafnvel þó hún ætti í höggi við krabbamein.“

Obama sagðist fagna sögulegri forystu og óvenjulegu hugrekki demókrata á þinginu sem tryggðu framgang frumvarpsins.

Þá fagnaði Joe Biden deginum sem sögulegum degi sem myndi breyta lífi tugmilljóna Bandaríkjamanna. Með lögunum munu sjúkratryggingar ná til um  95% Bandaríkjamanna í stað 87% áður. Tryggingafyrirtækjum verður bannað að hafna því að tryggja fólk sem á við heilbrigðisvanda að stríða.

Samkvæmt vef BBC eru nýju lögin sögð búa til stærsta öryggisnet á vegum alríkisstjórnarinnar frá því að Lyndon Johnson þáverandi Bandaríkjaforseti setti fram umbætur í heilbrigðismálum sem átti meðal annars að tryggja öldruðum og fátækum heilbrigðisþjónustu á sjöunda áratug síðustu aldar.

Barack Obama glaður í bragði. YURI GRIPAS