Netanyahu kemur til Hvíta hússins í gærkvöldi. Reuters

Barack Obama, Bandaríkjaforseti, og Benjamin Netanyahu, forsætisráðherra Ísraels, áttu tvo fundi í Hvíta húsinu í Washington í gærkvöld. Ýmislegt óvenjulegt gerðist í tengslum við þessa fundi. Ljósmyndarar fengu ekki að mynda upphaf þeirra og engar upplýsingar voru veittar um hvað leiðtogunum hefði farið á milli. 

Fréttaskýrendur segja að þetta sé til marks um þá spennu, sem ríki í samskiptum ríkjanna vegna áforma Ísraelsstjórnar um að reisa hús fyrir gyðinga í austurhluta Jerúsalem.  Ísraelsmenn tilkynntu um þessi áform fyrir hálfum mánuði þegar Joe Biden, varaforseti Bandaríkjanna, var staddur í Ísrael.

Obama og Netanyahu sátu upphaflega á eins og hálfs tíma löngum fundi á skrifstofu forsetans í Hvíta húsinu, hálftíma lengur en áformað var. Obama fór að fundinum loknum inn í íbúð sína en Netanyahu fór inn í fundarherbergi til að ráðgast við aðstoðarmenn sína. Hann óskaði síðan eftir öðrum fundi með Obama sem kom aftur niður á skrifstofu sína þar sem þeir Netanyahu ræddu saman í 35 mínútur.

Hvíta húsið sendi ekki frá sér formlega yfirlýsingu um hvað rætt var um á fundunum eins og venja er. Þá vildu ísraelskir embættismenn ekki tjá sig um málið.  

Ísraelsstjórn kynnti í gær áform um að reisa hótel, skrifstofuhús og íbúðarhús fyrir Palestínumenn í miðborg austurhluta Jerúsalem. Palestínumenn sögðu hins vegar að þetta væri óviðunandi greiðsla fyrir nýja gyðingabyggð í borginni.