Lögreglan í New Jersey í Bandaríkjunum tilkynnti í gær, að búið væri að upplýsa hvernig stóð á því að fimm unglingspiltar hurfu sporlaust í borginni árið 1978. Hafa tveir karlmenn á sextugsaldri verið handteknir og ákærðir fyrir að hafa lokkað piltana inn í byggingu, læst þá þar inni og kveikt í.

Lögreglu hefur lengi grunað að piltarnir hafi látið lífið í eldsvoðanum en þar sem ekki var tilkynnt um hvarf piltanna fyrr en tveimur dögum eftir brunann og húsið brann til grunna var aldrei leitað að líkamsleifum í rústunum.  

„Áratugum saman hafa fjölskyldur þeirra velt því fyrir sér hvað gerðist þennan ágústdag," sagði Robert Laurino, saksóknari, í gær, „En við teljum okkur geta svarað þeim spurningum í dag."

Ættingi eins fórnarlambsins segir, að annar mannanna, sem nú hefur verið ákærður, Lee Evans, 56 ára, hafi játað fyrir honum í lok ársins 2008, að hafa tekið þátt í að myrða piltana. Lögreglurannsókn hófst í kjölfarið og er henni nú lokið. Auk Evans er Philander Hampton, 53 ára, ákærður í málinu.

Leitað var að piltunum fimm um öll Bandaríkin og víðtæk rannsókn fór fram á mannshvarfinu. Leitaði lögreglan meðal annars aðstoðar sjáenda. Nú telur lögregla, að piltarnir hafi verið lokkaðir í yfirgefið hús í hverfinu þar sem þeir bjuggu. Þeir hafi verið bundnir og síðan kveikt í húsinu. Ástæðan mun hafa verið, að þeir Evans og Hampton töldu, að einn drengjanna hefði stolið maríjúana frá þeim.

Bæði Evans og Hampton voru yfirheyrðir vegna hvarfs piltanna en hvorugur var ákærður þá. Fjölskyldur piltanna töldu hins vegar ekki ólíklegt að Evans hefði átt hlut að máli.