Toshikazu Sugaya

Japanskur karlmaður sem var á bak við lás og slá í sautján ár var beðinn formlega afsökunar af hinu opinbera í dag en sannað þykir að hann gæti ekki verið sekur um glæp sem hann var dæmdur fyrir árið 1991. Maðurinn var látinn laus úr fangelsi í júní í fyrra en þá hafði hann afplánað refsingu sína.

Toshikazu Sugaya, 63 ára, fyrrum skólabílstjóri, var dæmdur fyrir mannrán, kynferðislegt ofbeldi og að hafa myrt fjögurra ára gamla stúlku árið 1991. Nú hafa lífsýni sýnt fram á að ekki er mögulegt að hann hafi framið glæpina sem hann var dæmdur fyrir. Morðinginn gengur enn laus.

Masanobu Sato, héraðsdómari, bað Sugaya formlega afsökunar í dag fyrir hönd japanskra yfirvalda. Að sögn Sato biður hann Sugaya innilegrar afsökunar á því að ekki var hlustað á orð hans á sínum tíma.

Sugaya var eins og áður sagði látinn laus í júní en þá fyrirskipuðu yfirvöld að réttað yrði yfir honum að nýju þar sem miklar efasemdir höfðu komið upp um þær aðferðir sem beitt var við rannsókn málsins á sínum tíma. Þeim réttarhöldum lauk í dag með sýknu.  Sugaya tárfelldi við dómsuppkvaðninguna í dag og sagði að loksins hafi réttur dómur verið kveðinn upp í málinu.

Sugaya var fyrst handtekinn síðla árs 1991 fyrir að hafa rænt stúlkubarni í Ashikaga, norður af Tókýó árið á undan. Lík stúlkunnar fannst síðar í á skammt frá þeim stað sem henni var rænt. Hafði hún verið beitt kynferðislegu ofbeldi.

Sugaya játaði á sig glæpinn á sínum tíma en dró játninguna síðar til baka og sagði að játningin hafi verið þvinguð fram af lögreglu með harðræði. Hann var hins vegar dæmdur í lífstíðarfangelsi fyrir morðið á stúlkunni árið 1993. Hæstiréttur Japans staðfesti dóminn árið 2000.