Skæruliðar LRA í Úganda myrtu að minnsta kosti 321 þorpsbúa í árásum sem samtökin gerðu á þorp í Lýðveldinu Kongó í desember. Í skýrslu mannréttindasamtakanna Human Rights Watch kemur fram að árásirnar hafi verið afar vel skipulagðar en þær stóðu í fjóra sólarhringa.

HRW kynnti skýrsluna í höfuðborg Úganda, Kampala, í morgun. Þar kemur fram að auk þeirra sem týndu lífi í árásunum hafi 250 þorpsbúar, þar af áttatíu börn, verið numin á brott í árásunum í Haut Uele  héraði þann 14.-17. desember.

Kaþólskur prestur sem starfar í Isiro-Niangara á sama svæði og árásirnar voru gerðar, sagði í samtali við AFP fréttastofuna að um þrjátíu liðsmenn LRA hafi gert árás á um tug þorpa í i Haut Uele, sem er í Orientale héraði. „Þeir myrtu að minnsta kosti 300 manns. Þeir rændu einnig á milli 200-400 þorpsbúum áður en þeir létu sig hverfa."

Í skýrslu HRW kemur fram að flestir þeirra sem voru myrtir voru fullvaxta karlmenn. Flestir þeirra voru bundnir og síðan barðir til bana. En auk karla voru 13 konur og 23 börn myrt. Þar á meðal þriggja ára gömul stúlka sem var brennd lifandi. Eins voru einhver fórnarlambanna bundin saman við tré þar sem höfuðkúpur þeirra voru brotnar með öxum, samkvæmt skýrslunni er hún er rituð eftir ferð samtakanna á svæðið í febrúar þar sem morðin voru framin. 

Liðsmenn LRA samtakanna þykja sérlega harðskeytir og eru þeir m.a. þekktir fyrir því að aflima fórnarlömb sín og ræna börnum til hermennsku og kynlífsánauðar. Á rúmlega tuttugu ára ferli þeirra hafa verið birtar skelfilegar lýsingar á því hvernig þeir hafa framið voðaverk bæði í Lýðveldinu Kongó og Úganda.