Dominique Strauss-Kahn. Reuters

Dominique Strauss-Kahn, framkvæmdastjóri Alþjóðagjaldeyrissjóðsins, segir að það hafi komið ánægjulega á óvart hversu hratt Afríkuríki og ríki í Suður- og Mið-Ameríku hafi náð sér upp úr alþjóðlegu efnahagslægðinni.

„Þegar þú skoðar Rómönsku-Ameríku og Afríku, þá verður þú hissa,“ sagði Strauss-Kahn í ræðu sem hann flutti í skóla sem kennir hagfræði í Varsjá í Póllandi.

„Áður fyrr var Rómanska-Ameríka sá hluti heimsins þar sem ávallt komu upp vandamál. Nú hafa þeir ekki farið jafn illa út úr kreppunni. Í fyrsta lagi vegna þess að bankarnir þeirra voru ekki jafn tengdir alþjóðafjármálakerfinu, og þeir nutu því verndar. Ekki ónæmir, heldur varðir,“ sagði Strauss-Kahn.

Þá hrósaði hann jafnframt hagkerfum ríkjanna í Rómönsku-Ameríku fyrir að hafa haldið rétt á málum áður en kreppan reið yfir heiminn. Hann segir að traustar stofnanir og skýr stefna skipti máli þegar erfiðleikar blasa við.

„Það kom því mörgum okkar á óvart að Rómanska-Ameríka hafi staðið sig svona vel.“

„Það sem kom okkur enn meira á óvart er að það sama hafi gerst í Afríku. Ég er ekki að segja að þeir hafi ekki fengið högg á sig. Þeir hafa fengið þyngsta höggið, en þeir eru á ná skjótum bata,“ sagði Strauss-Kahn.