Lestarteinarnir sem liggja til Sobibor þar sem áður voru útrýmingarbúðir nasista.

Austur-Evrópsk fórnarlömb nasista úr Seinni heimsstyrjöld lögðu í dag fram kröfu þess efnis að þýska lestarfyrirtækið Deutsche Bahn greiði þeim bætur fyrir þátt sinn í að flytja þau í útrýmingarbúðir.

„Sem arftaki Deutsche Reichsbahn ætti fyrirtækið loksins að axla siðferðilega og fjárhagslega ábyrgð sína," segir í yfirlýsingu sem skrifað var undir í Varsjá í Póllandi í dag af tugum samtaka fórnarlamba nasista frá Hvíta-Rússlandi, Póllandi, Rússlandi og Úkraínu.

„Við erum eftirlifendur dauðaflutninganna. Deutsche Reichsbahn var borgað fyrir hvern kílómeter sem það flutti okkur nær útlegð, fangelsisvist og gjöreyðingu. Það græddi á fjöldamorðum," segir í yfirlýsingunni.

Hin sameiginlega krafa kemur í kjölfar sambærilegra kröfu sem samtök pólskra fórnarlamba settu fram í janúar, um „mannúðlegan stuðning" við meðlimi sína. Rannsóknir benda til þess að Deutsche Reichsbahn hafi þénað sem nemur að minnsta kosti 445 milljónum evra fyrir að flytja fórnarlömb nasista í útrýmingarbúðir.