Blóm á lestarteinum Park Kultury stöðvarinnar í Moskvu þar sem önnur konan sprengdi sig í loft upp í dag. DENIS SINYAKOV

Sprengjurnar sem ollu dauða 38 farþega í neðanjarðarlestarkerfi Moskvu eru ekki þær fyrstu sem rekja má til kvenkyns sjálfsmorðssprengjumanna, því fyrir 10 árum síðan voru borgarbúar lamaðir af ótta vegna tíðra sprengjuárása kvenna.

Þær voru kallaðar Svörtu ekkjurnar og voru ungar konur, flestar frá múslimasvæðum í Norður-Kákasus, sem höfðu margar misst karlkyns ættingja sína í átökum við öryggissveitir yfirvalda.

Eftir fjölda blóðugra árása sem ollu dauða margra í byrjun áratugarins hafa Svartar ekkju varla heyrst né sést síðustu 5 árin, þar til nú. Yfirvöld í Moskvu segja tvær konur með tengsl við Norður-Kákasus bera ábyrgð á sjálfsmorðssprengjunum í borginni í dag og virðist því vera sem Svörtu ekkjurnar séu snúnar aftur.

Það voru ungar konur hlaðnar sprengjuefnum sem drápu 185 manns í herbúðum Rússa árið 2002, og á rokktónleikum í Moskvu árið 2003 og einnig voru það konur sem gerðu tvöfalda sjálfsmorðsárás í flugvél árið 2004. Konur komu líka við sögu í umsátrinu sem stóð í þrjá daga í Dubrovka leikhúsinu í Moskvu, þar sem 19 af 41 árásarmanni voru ekkjur eða mæður sem misst höfðu börn sín.

„Við vitum lítið um líf þessara kvenna fyrir árásirnar og hvað veldur því að þær taka af skarið," hefur AFP eftir Alexander Cherkasvo, sérfræðingi í Norður-Kákasus svæðinu. „Mín tilfinning er sú að oftar en ekki sé það hefndarþorsti sem ýtir þeim út í opinn dauðann. Þær eru að hefna fyrir ástvini sína og fyrir sjálfar sig."

Yfirvöld í Moskvu leita nú tveggja vitorðskvenna sem taldar eru viðriðnar árásina í dag og sáust á öryggismyndavélum fylgja sjálfsmorðssprengjukonunum tveimur að lestarstöðinni þar sem þær sprengdu sig í loft upp.