Andstæðingar dauðarefsinga fyrir utan San Quentin-fangelsið í Bandaríkjunum. AP

Amnesty International skorar á kínversk yfirvöld að greina opinberlega frá fjölda aftaka í landinu og hversu margir hafa verið dæmdir til dauða. Segja samtökin að 714 einstaklingar að minnsta kosti hafi verið teknir af lífi í 18 löndum á síðasta ári og að lágmarki 2001 einstaklingur var dæmdur til dauða í 56 löndum.

Í þessum tölum koma ekki fram þúsundir aftaka sem líklegt er að hafi átt sér stað í Kína á síðasta ári, þar sem upplýsingar um dauðarefsingar í Kína eru enn ríkisleyndarmál.  

Yfirlitsskýrsla Amnesty International um dauðarefsingar 2009 er birt í dag en þar er gefið yfirlit yfir þau lönd sem enn beita dauðarefsingum.  Í áskorun til kínverskra yfirvalda krefjast samtökin þess að leyndinni verði aflétt og yfirvöld tryggi gagnsæi. Amnesty International hefur ákveðið að birta ekki eigin lágmarkstölur um aftökur og dauðarefsingar í Kína á árinu 2009, þar sem tölurnar eru ekki taldar endurspegla raunverulegt umfang aftaka í landinu. 

Rannsóknir Amnesty International sýna að  388 aftökur hafi farið fram í Íran í fyrr, að minnsta kosti 120 í Írak, að minnsta kosti 69 í Sádi-Arabíu og 52 aftökur í Bandaríkjunum. Þá segja samtökin að á síðasta ári hafi dauðarefsingum mikið verið beitt í Kína, Íran og Súdan til að senda pólitísk skilaboð og þagga niður í pólitískum andstæðingum.

Í Íran er vitað um að 112 hafi verið líflátnir á átta vikna tímabili milli forsetakosninganna 12. júní 2009 og embættistöku Mahmouds Ahmadinejads sem forseta landsins þann 5. ágúst 2009.

Fjöldi ríkja, sem hafa afnumið dauðarefsinguna algjörlega úr lögum, hefur aukist eftir að Búrúndí og Tógó afnumdu dauðarefsingu fyrir alla glæpi. 95 ríki heimila ekki dauðarefsingar.

Engar aftökur voru framkvæmdar í Evrópu á árinu 2009, í fyrsta sinn frá því að Amnesty International hóf skráningar. Hvíta-Rússland er eina landið í álfunni sem enn beitir dauðarefsingum. Bandaríkin voru eina landið í Ameríkuríkjum sem framkvæmdi aftökur 2009.