Akio Toyoda, forseti japanska bifreiðaframleiðandans Toyota, boðaði til blaðamannafundar til að greina frá því að sérstök nefnd hafi verið sett á laggirnar, en hún á að tryggja gæðaeftirlit á heimsvísu. Markmiðið er að vinna aftur traust almennings í kjölfar innkallana.

Toyota varð fyrir miklu áfalli þegar það varð að kalla inn mikinn fjölda bifreiða vegna öryggisgalla og hafa forsvarsmenn fyrirtækisins unnið að því að takmarka þann skaða sem vörumerkið hefur orðið fyrir.

Fimmtíu eiga sæti í nýju nefndinni sem hefur öryggismál og gæðaeftirlit á oddinum, að sögn Akio Toyoda. „Ég áttaði mig aftur á því að vörurnar okkar eru líf okkar, og gæði varanna - þá sérstaklega gæði sem varða öryggismál - er líflínan,“ sagði hann á fundinum sem fór fram í höfuðstöðvum Toyota í Japan.

Toyota varð að innkalla tæpar 9 milljónir bifreiða á heimsvísu vegna framleiðslugalla, en dæmi eru um bensíngjafir sem hafi fest sig auk þess sem galli hefur komið upp í bremsukerfi Toyota-bifreiða.

Gæðaeftirlit er nú efst á baugi hjá Toyota. Fyrirtækið vill nú einblína á að taka ákvarðanir á hverju svæði fyrir sig í þeim tilgangi að geta brugðist betur við kvörtunum og þörfum viðskiptavina sinna