Embættismaðurinn átti nokkra fundi með Rússum í New York, að því er Expressen greinir frá. mbl.is/Einar Falur

Sænska dagblaðið Expressen greinir frá því í dag að sænskur embættismaður hafi lekið viðkvæmum leyniupplýsingum um Evrópusambandið til rússneskra stjórnvalda. Þetta hefur blaðið eftir fyrrum starfsmanni rússnesku leyniþjónustunnar, sem hefur flúið land.

„Hann lét okkur í té mikið magn upplýsinga og skjala, sérstaklega varðandi samskipti fyrrverandi ríkja Sovétríkjanna við ESB og NATO,“ segir Sergei Tretyakov í viðtali við Expressen.

Tretyakov segir að sænski ríkiserindrekinn, sem hefur ekki verið nafngreindur,  hafi gengið til liðs við Rússa á fundi sem fram hafi farið í New York seint á tíunda áratugnum. Þar hafi hann átt nokkra fundi með rússnesku utanríkisleyniþjónustunni (SVR) árið 1999 og 2000.

Rússarnir gáfu njósnaranum dulnefnið Silverster, sem kom leynilegum upplýsingum á framfæri sem hann komst yfir í gegnum innra upplýsinganet sambandsins, sem kallast Coreu.

„Hann var mikils virði. Hann veitti okkur stöðugan og mikilvægan aðgang að nýjustu upplýsingum,“ segir Tretyakov.

Hann segir að Rússar hafi m.a. fengið upplýsingar varðandi átökin í Kosovo í fyrrum Júgóslavíu, sem hafi skipt Rússa miklu máli.

Þá lét hann Rússa fá upplýsingar sem komu fram í samtölum við aðra embættismenn. 

Sænski ríkiserindrekinn, sem er enn sagður starfa hjá sænska utanríkisráðuneytinu, játar í samtali við Expressen að hann hafi átt í samskiptum við rússneska fulltrúa er hann starfði í New York. Hann heldur því hins vegar fram að ummæli Tretyakov séu misvísandi.

Sænska leyniþjónustan fékk upplýsingar um málið frá bandarísku leyniþjónustunni. Fram kemur í frétt Expressen að saksóknarinn Tomas Lindstrand hafi hafið rannsókn á ásökunum um njósnir árið 2002.

Þremur mánuðum síðar hafi rannsókninni verið hætt, þar sem fyrst og fremst hefði verið um pólitíska upplýsingar sem embættismaðurinn hefði komið á framfæri.

„Svo litið yrði á þetta sem njósnir, þá verð ég að sanna að upplýsingarnar sem láku hafi varðað þjóðaröryggi, og það er erfitt að færa sönnur á það í þessu máli sem tengist pólitískum upplýsingum segir Lindstrand í samtali við Expressen.