Séra Raniero Cantalamessa, sérlegur prédikari páfa, baðst í morgun afsökunar á því að hafa í prédikun í Péturskirkjunni á föstudagskvöld líkt gagnrýni á kaþólsku kirkjuna við gyðingahatur.

„Hafi ég óafvitandi sært tilfinningar gyðinga og þeirra, sem sætt hafa árásum barnaníðinga, þá harma ég það og biðist afsökunar," hefur ítalska blaðið Corriere della Sera eftir Cantalamessa í dag.

Cantalamessa er sérlegur húsprédikari páfa og eini kaþólski presturinn sem má prédika að páfa viðstöddum. Hann prédikaði í Péturskirkjunn á föstudagskvöld að Benedikt páfa XVI viðstöddum og sagðist vera innblásin af bréfi frá vini sínum, sem er gyðingur. Sá segðist vera í miklu uppnámi vegna þeirra árása sem páfi hafi mátt sæta að undanförnu vegna umræðu um kynferðisbrot presta gagnvart börnum.

Las Cantalamessa upp úr bréfinu þar sem sagði m.a: „Notast er við staðalmyndir og persónulegri sekt manna og ábyrgð er umsnúið í sameiginlega sekt. Þetta minnir mig á ógeðfelldustu hliðar gyðingaofsókna.“

Federico Lombardi, talsmaður Páfagarðs, lét eftir messuna hafa eftir sér að Cantalamessa hefði ekki talað á vegum Páfagarðs. Tók hann fram að samanburður sem þessi gæti valdið misskilningi og þetta væri ekki opinber afstaða kirkjunnar. Prédikun Cantalamessa var engu að síður birt í heild sinni á forsíðu L'Osservatore Romano sem er opinbert blað Páfagarðs. 

Talsmaður fórnarlamba kynferðisofbeldis kaþólskra presta í Bandaríkjunum sagði ummæli Cantalamessa siðferðilega röng. Framkvæmdastjóri samtaka þýskra gyðinga, Stephan Kramer, sagði ósvífnina sem í ummælunum fælust, ekki eiga sér nein fordæmi. 

Umræðan um barnaníðinga í klerkastétt og hvernig æðstu menn rómversk-kaþólsku kirkjunnar hafa þaggað þau mál niður áratugum saman hefur valdið miklum titringi innan kirkjunnar. Í Þýskalandi hefur stuðningurinn við kirkjuna snarminnkað á fáeinum vikum. Nú treysta aðeins 17% Þjóðverja kaþólsku kirkjunni.